向佐去年因內地真人騷《最美的時光》同郭碧婷傳出緋聞，戀情曝光後，二人經常形影不離，而向太亦對呢位「未來新抱」讚不絕口。日前，有台灣傳媒影到雙方家人一齊聚餐，並指向佐設宴目的係為咗提親。

雖然郭碧婷嘅經理人就話無咁嘅事，但向太今日就喺微博宣佈囝囝向佐已求婚成功，並指紙包不住火：「所以我們欣然接受大家的祝福！我們雙方父母都很開心，什麼時候才有婚禮那又是另一個更美好的事，希望能盡快吧！我也不知道是什麼時候今天自爆料到此結束。期待中………謝謝大家」

拍拖一年都未夠就拉埋天窗，向佐就表示係因為唔想錯過郭碧婷，並大讚佢入行咁耐都無受到污染，不過問到婚期係幾時，向佐就話未有確實日期，但就強調一直都有結婚計劃。